nach de 1.schuelwoche

so,jez faht di eigentlichi arbet ah, de post øber mis wohlergehe ide schuel=P

zerst emal: das ganze gschwætz vo wæge "norweger sind so chalt, d'afangsziit werd so hart,bereitet oich druf vor voll de outsider z'sii" etc esch humbug! zum glueck :D

woni am mo.id schuel cho bin esch mer seehr mulmig gsi. de trygve hæd mich zo minre klasselehreri bracht,mit ihre bini ad gedænkfiir før utøya gange. also es sind all im schuelhof gsi, zerst hæd en schueler e red ghalte, speziell betruret esch eine worde wo in kongsbakken(minre schuel) id schuel gange esch.
dænn hæds e schwigeminute geh. esch ræcht idruecklich gsi, alles isch still gsi bis uf de ræge.

dænn hani mi im schuelzimmer allei anen bank gsezt. und es esch verbii gsi mitm de-afang-wird-wahrschinli-so-hært gfuel, es esch næmli es meitli(anni heisst sie)næbed mich anegsæsse und mer hænd afange rede. ide laange pause womer nachher gha hænd beni mit ere und na 4 anderne ines kafi gange.
sie hænd verzellt sie seged eig emmer z'5. zæme, gøched gern i kafis, mached filmabige,choched zæme...
sie hænd mich dænn grad zo ihrere fb gruppe hinzuegfuegt(bin liecht gschockt gsi, en fb gruppe macht das ganze scho ræcht clique-haft..), am mi. simer zode anni hei ga dirty dancing luege und tacos gæsse.
au wænn mi das clique-hafte am afang ræcht abgschreckt hæd hani gseh, dasses ned heisst dassi NOR mit ehne chan zæme si, s'esch v.a.dass mer bim zmittag zæmesitzed und so. ide stunde oder pause redi au ræcht vell mit anderne vode klass.

au abgseh vo dene sind eig all woni kænnelehre ræcht offe, immer fruendlich und bestefalls sogar sehr sympathisch und interessiert. han z.b. im franzøsisch eini kænneglehrt wo letscht jahr in kanada gsi esch, im franzøsischsprachige teil. d'lehreri hæd gfunde mer seged so underforderet ide stund,mer chøned au eifach chli ga umelaufe und schwætze xD
s'hæd voll guet ta wedermal franzøsisch z'rede, und han mit schrecke muesse bemerke dassi scho mega vell vergæsse han (omg,ich han nøm gwøsst wie d'wochetæg heissed o.0)

gester beni mit "de clique" ga shoppe gsi, es hæd mi voll ufgmunteret emmer "det er veldig fint"="das esch sehr schøn" z'ghøre =D han næmli under de woche chli komplex becho, di meiste ide schuel sind meega styllisch und es git ueberdurchschnittlich luet wo eifach guet usgsehnd. und ich so verpennt,ungschminkt und mit buschige haare^^
au wænni mi met ehne mængisch na eher fremd fuele, v.a. weli d'sprach nani so guet und drum d'witz ned uf ahieb verstahne(ussert sie sind uf englisch:D), und dra mues dænke wievell eifacher s verstændige wær mit fruende vo deheime, sie sind mer scho as herz gwachse=) und mer hænd ja na es jahr ziit zom mitenander verbringe :D
es esch soones cools gfuel be allem chønne z'dænke; keein stress,ich han es jahr ziit! wel wæmer sost amne coole ort esch eschs før rel. churzi ziit,und mer hæd immer na im hinderchopf dass mer gli weder gad.

am abig beni bede aleksandra diheime gsi, es hæd soo en schøne sunneuntergang gha! (siehe fotos=)
und mer sind umes fuerli umegsæsse und hænd de ach-so-warmi-sommerabig gnosse (d'aleksandra und ich igmummt i wolledeckene und winterjacke)
det war veldig koselig. (=das war sehr ..koselig esch mer mit gemuetlich,bequem,behaglich,agnehm,warm umschriebe worde,es meega tolls wort :D)
bin so froh dassi ned ide schwiiz verschwitze :P

und wiederemal chømemer scho zode verabschiedig, wuensch oich allne en schøni ziit und bis zum næchste mal=)

ps: konstruktivi kritik, lob,zuesætzlichi frage oder sostigi kommentær-> nur raus damit, keine falsche scheu :D

mini kuuhle neue fruende xD

de hafe am abig

anita, de grøssti justin bieber fan wos je hæds gits, sie schlat sogar d'tanja,martia,fischi und heli^^ esch aber ganz e liebi=)

anni&kristell

klassezimmer mit klavier-wie cool :D han mi nach de stund nachli anegsetzt und gspillt, endlich wederemal=)

mer lehred i mathi grad d'potenzregle, hach wie interessant^^ ich bin aber au im eifachste mathelevel, lueg mal øbi wæchsle chan..

le corridor (gits das wort?*verwirrt am kopf kratz*)

kongsbakken vidergående skole

1. d'stadt-bibliothek: gymnasial, geråumig und gmuetlich(mis gschickt im umgang mit de duetsche sprach..^^)  han scho e charte det*stolz*

herzigs kafi woni plane mal hi z'ga

d'brugg woni jede tag drueberfahre, und am ræchte ændi esch d'iis kathedrale, e beruemti chile. woni schandhafterwiis nani dinne gsi bin..

das bild esh eig nor denne damit ich oich chan verzelle dassi mitm bus id schuel gang =D

@claudio: vo dem chøntisch der z.b. es bild mache lah! =)

aleksandra&ich

aleksandra vo nøch,demit ehr wøssed mit wem ich mini zit verbringe da :P

de versuech es <3 darz'stelle

di eifacher variante =)

føteli vo gratangen (woni letscht wochenænd gsi ben)

mært in gratangen-DAS ereignis des jahres, und ich war da :D

usstellig vomne iheimische kuenstler-so um di 30i und hæd seehr kuenstlerisch gwuerkt, han sogar mit ihm øber sini bilder gredet *soo gebildet vorkomm*

mini gasteltere, unni und trygve

schøns fischerdørfli esches=)

die meega coole birkewælder *liieb*

es rasthuettli,de bach,d'brugg und ich :P

ich in gross,d'bestætigund dassi fit und munter bin

huus

mis zimmerli

cooli blaui chuchi

die rampe esch en super tagebuech-schrib-platz (s'rote huesli druf esch mal en chuestall gsi)

PLACEBO (kei idee før de titel gha:D)

heiia allersiits:)
als reaktion uf ungeduldigi luet chont da wedermal en post. ich probier en ergendwie øbersichtlich z'bhalte und i verschidnigi theme z'unterteile..

zerst aber na en drischiss: han høt freiwillig brun ost(de bruuni chæs wo nach caramel schmøckt)gæsse, mues sæge,wæmr sich a de gedanke gwøhnt hæd dass chæs nach caramel chan schmøcke esch er gar nøm soo schlimm :P

arrival camp
besagti ungeduldigi luet hænd gfunde mer wøssi als blog-læser z'wenig øber s'arrival camp,also chømed jez velli wahrschinli uninteressanti sache drueber:D da esch s'programm,ich hoff mer chas einigermasse læse:P

de ganz sa. hani ned gha wel mer am 4i hænd  muesse ufstah und an flughafe ga..
es hæd wiemer gseht immer verschednigi bløck gha. es paar sind so gsi dass all zæme imne ruum gsæsse sind und vorne luet gstande sind und øpis verzællt hænd.(culture and values z.b.)
det wo stat "reflection" simr i chlinere gruppe gsi, also 6 ustuschschueler und 2 leiter.
es isch dænn z.b. ebe um kultur und wert gange, was mer als kultur empfinded, was alles dezue ghørt womer vlt ned dra dænkt.
kultur chamer mitme isberg vergliche, d'spitze vom iisberg esch das womr grad gseht, z.b. æsse, fester, d'sprach etc.  de teil vom isberg wo underem wasser liit-de grøssti teil-esch das womer ned sofort gseht, umgangsforme womer ois so gwøhnt sind dass mer ois gar ned druf achted, d'asichte was guet und richtig, erstrebenswert oder ned erstrebenswert esch. ka øb das ewie verstændlich erchlært esch ;)

zwøschedure hæd mer immer chli ziit gfunde zom neui luet kænne lehre oder mit altbekannte witerz'schwætze:)  s'esch eifach meega cool gsi:D

training
am mo.,di. und mi. beni mit de solveig(minre gastschwøster)is training gange. devo hani en grauuusige muskelkater gha :S ^^
s'niveau esch seehr høch, ich hinke irgendwo hindena,wienis erwarted han.. :P
underschied zom training ide schwiz: s'werded alli dethii gfahre, niemert duschet am schluss,s'gønd alli hei o.0, es sitzed meistens es paar eltere am rand und lueged zue und schwæzed.
sost eschs rel. æhnlich. ussert dasses halt uf norwegisch esch und ich nuet verstahne. bin ja sowieso ned di schnællst im uebige chegge, aber wænnis ned mal erchlært bechome o.0 ich geb jedefalls mis beste:)
wasi sowiit a norwegisch im trainig glert han "braa Solveig, braa" (bra heisst guet) sie duend sich gægesiitig emmer voll nett afuere und ermuntere(mich au:D).
so,dasch alles womer zom training ifallt :)

1.kafi-bsuech :D
di 1.hælfti vom do. esch vo eeewig langem astah bede polizei zom d'amældigs-formular abgeh(før dassi es jahr dørf da blibe) ignah worde.
før nachher hani mit de aleksandra, en ustuschschueleri wo 5km vo mer weg wohnt,au adi glich schuel gad und vo pole esch, abgmacht gha zom ines kafi ga.
s'esch es super gfuel gsi, zur abwæchslig mal øpis "normals" z'mache, mit enre kollegin ines kafi ga :P mit ihre rede esch lustig und befreiend gsi, so vo glich zo glich^^
sie hæd z.b. verzellt dasses sie stresst dass eri gastfamilie die ganz ziit øpis wot mit ihre mache, mer hænd ois drin bestærkt dasses normal esch dass mer ned wørkli øpis z'rede wøssed mit oisne gastgschwøsterti...
bin froh dass sie so ide nøchi wohnt, ich gang i nøchster ziit mal mitm velo be ihre verbii und fuel mich debii mega sælbstændig :P

bus-versage
nur en chline ahang zo obrigem dingsda. ufm heiwæg hætti sølle wøsse wænni mues usstige,han mi aber natuerlich nøm an name vode haltestell erinneret... han also be jedere station wo so usgseh hæd als wærs di richtig druckt, schlussendlich øpe 4 fehlalærm wo de bus aghalte hæd,niemert usgstige esch und mich alli vorwurfsvoll agluegt hænd(wæhrend d'aleksandra und ich ois lachend hinderem sitz versteckt hænd, seehr riifs verhalte,ich weiss^^)
zum glueck hani am schluss mini station erkænnt und de wæg hei gfunde:)

schuelam mi. send ich, trygve(gastvater) und d'solveig id schuel gange før dassi d'fæcher chan uswæhle. han mich gæge s'musigprogramm entschiede weli det nur mega wenig "normali" stunde gha hætti und be minre rueckkeh ad kanti wettige mit zemlicher sicherheit gscheiteret wær...
ich liste eifach mal uf vo was ich wievell stunde han:
3h mathe
2h geschichte
4h franzøsisch
5h englisch
5h chemie
5h physik
2h sport
8h oder so øpis i die richtig norwegisch afangs-understuetzigs-intensiv-kurs
vlt muesi amigs ned is turne und han stattdesse norwegisch, ka wie das so lauft. jedefalls hæd die frau vode schuel gseit ich wird ned meh als 30 schuelstund ha =)

witeri schuel informatione: die schuelstufe heisst vidergående skole, øpe weitergehende schule
sie gat 3 jahr, vom 11. bis zum 13. schueljahr, ich chom idi 2.klass.
mini schuel heisst kongsbakken,falls øper wett føteli im internet sueche..
aja, d'schuel faht am mo. am 9i ah. wønsched mer glueck dass mer nuet pinlichs passiert :D

gratangen
set gester abig bini mit mine gasteltere und minre gasttante(seit mer das so?tønt komisch)in gratangen. das esch s'heimatdørfli vom trygve.
mer wohned im huus wo er ufgwachse esch, føteli folged ergendwænn^^
im dorf esch grad sonen mært, de esch 1mal im jahr und schins voll de høhepunkt. det semer høt gsi, ich kænn jetzt s'ganze dorf, und alli kænned "gianna, en sveitsisk utvekslings student" (gianna, our swiss exchange student) :P
han øpis witers komischs gæsse, næmli fischzunge o.0 gschmøckt hæds ja na guet, aber d'konsistenz esch meega zunge-mæssig gsi*schauder*
dænn hæmer min.1 stund lang norwegische gedicht glauscht und ich wær fast igschlafe..und dænn hani met emne maler øber sini bilder gredet woner usgstellt hæd*åusserst gymnasial fuel*
gæg abig sind trygve, aria(de hund) und ich nachli is tal hindere gwanderet, meega schøni birkewælder! bilder folged ebefalls:)

so, mer nøchered ois em ændi, ich verabschiede mich zum e talkshow luege woni ned verstah und e chappe fertigz'lisme :)

and who am i? that's a secret i'll never tell. u know u love me, xoxo, gossip girl
seehr unnøtig,ich weiss :D aber ich hans scho so lang nøm gseh *schniefz* :P

liebi gruess usem herzige gratangen =)

hallo mitenander zum 2. :)

ich wird chli komisch schribe wæg dere doofe norwegische tastatur,lønd oich ned irritiere:D
æ=a mit puenktli, ø=o mit puenktli 

teil 1: arrival camp
das esch megamæssig cool gsi, my english is now perfect:P und auch mein deutsch hat sich verbessert, denn ca. die hælfte aller austauschschueler die nach norwegen kommen sind deutsche o.0
han ganz vell neui liebi luet kænneglert, usegfunde dass norweger 4mal am tag æssed, norwegischi zungebræcher glert(ibses ribsbusker og andrø buskevekster), en norwegischi spezialitæt, brun ost=brune chæs,schmøkt nach chæs und caramel*uebergeb* aber wer weiss,vlt bechomis na gern...

teil 2: arriving in tromsø
nach enre reis wo bewise hæd dass ich so zemli the worst traveller ever bin(sackmæsser im handgepæck, en anderi ustuschschuelerin chans mer naschicke,sie hæds na chønne in koffer tue, pass vergæsse bede sicherheitskontrolle,gluecklicherwis gnueg frue gmerkt,nach enre halb stund gmerkt dassi au d'jagge bede sicherheitskontrolle vergæsse han..)send mer, ich, alexandra vo pole nd ole vo deutschland acho...
1.idruck: suupa:D d'familie kuemmeret sich voll lieb um mich,d'ussicht,s'huus und especially mis zimmer(mit balkon!)sind mega schøn...

ide stadt hæds zum teil chli unschøni shoppingcenter,aber defør au megavell herzigi, roti holzhuesli:D
gester abig semer zo nachbere ga brøtle, alli sind im t-shirt,paar barfuess umegloffe(ich ipackt i langi underhose und skijagge), und ich han walfleisch gæsse, esch na ræcht guet :P
aja,ich bin meegamæssig verchæltet,han s'gfuel mis ganze hirn esch verstopft:S
høt(so.)hæmer e wanderig gmacht,nachher beni i mim blueme-sommerchleid uf de terasse ga es schløfli mache(mer mues de summer usnuze!ich dænk scho wie d'norweger:P)
uf di 9.15 gangi mit de runa und solveig is kino id stadt, freu mich scho druf z'gseh was føres unglaublichs nachtlebe amne so.abig herrscht :)

ja,das wærs glaub øpe gsi:)
verbesserigsvorschlæg,kommentær oder sost øpis muender glaub øber mail mache,wel mer da ned chan kommentiere wæmr kes profil hæd..

hjertelig hilsen fra tromsø:) <3

tadaa,da sind na es paar bilder:D

erste idruck womer zom arrival camp gfahre sind...just AWESOME :)

ich und d'carmen(au vode schwiz)im arrival camp:D

mer gset schøn wer wohi chont:) (ich bin z'3.oberst mit na 2 anderne in tromsø)

norwegian school system

brøtle bede nachbere

das dunkle ide mitti esch...waaaaal fleisch

hiking in the mountains

oises huus

                                    

igangsbereich.linki tuer gad id stube, d'tuer zo mim zimmer esch ned ufm bild,wær grad ræchts.di offni tuer vore gad id chuchi

stube

chuchi und teil vode stube

mis wunderschøne zimmer:)

min fantastische balkon :P

und ich flieg,flieg,flieg wie ein flieger....

de tag vom abflug esch da...am 10 vor 5i stig ich in züri is flugzüg und mach mich uf d'reis*dramatisier*

bis gester abig häd i mer nor d'vorfreud,d'neugier eifach sones guets gfühl platzgha. scho klar beni trurig gsi, aber das immer abdämpft dur di ganzi freud(z.b. öber die börnrige abschlussgschänk, DANKE:D)

aber set gester abig wächsled sich ziitwiisi appetitlosigkeit,gruusigs gfühl im buch wie wänn es rentier dinne e fehlgeburt wör mache(insider,sry för die wo jez befremdet sind^^), und das freude-relaxed gfühl ab.

aber ich beschwer mich ned, ghört sehr wahrschinli halt alles dezue en richtige exchange student z'sii=P

 mer mues au säge, d'ziit esch wörkli langsam öberrif zum ga,bin mich scho set ca.emne monet vo allne verabschiede;)

wänni am 10 ab 7ni in oslo achome gits zerst es arrival-camp, dete werded alli ustuschschüeler wo mit yfu uf norwege gönd sii. und mer werded alli so guet wies gat uf das jahr vorbereitet.(mer lehred z.b.es paar sätzli uf norwegisch, juchuu^^)

dänn am sa. am 10 vor 11i chomi in tromsö a und triffe ändlich mini gastfamilie :D

somit verabschid ich mich mal uf witeres, mit em verspräche dassi mich sobald wie möglich usem hohe norde mälde:)

hjertelig hilsen, gianna:)

(heisst liebe grüsse uf norwegisch)