wederemal esch es ziitli vergange, und im folgende hani es paar sache usegsuecht wo mer wichtig oder interessant för oich erschined.
also ich chan längstens nöm alles ufschribe wonich erläbe, sost müesst ich fast pauselos am kompi sitze und posts schribe... und das esch ja ned d'meinig :)
 |
| schööön ischs in tromsø :) und so "hell" wirds öpe ide mørketid |
 |
| wienachtsbelüchtig ide stadt |
d'hälfti vode mørketid esch jetzt scho verbi. und am 17.mai fangts ah mit de d'mitternachtssunne(d'sunne gad nöm under), bin scho ganz gspannt wie das dänn esch :P
di ersti woche wos dunkel gsi esch womer us de schuel cho sind esch chli komisch gsi. aber wo dänn d'sunne ganz verschwunde esch hani eigentlich kein nennenswerte underschied gmerkt...
also wo alli so gseit händ, wännd id schuel gasch, und wännd vode schuel chonsch wirds dunkel sii, hani so dänkt "na und, esch ja dihei au so". irrtum. ide schwiz fangets a idunkle wämer vode schuel heigat, aber da esches stock-tüfsti-mitternacht-dunkel!
es git lüt wo ide mørketid immer müed sind oder schlafproblem händ, ich ghöre glücklicherwis ned zo dene :P
und mer sötti ide mørketid ned bis am 2 oder so schlafe, dänn esches nämli scho weder stockdunkel, und das verwirrrt die inneri uhr :)
mittlerwilerwile wirds scho u hell um d'mittagsziit, es esch voll cool! :D s'esch interessant wie schön en fast taghelle blau-orange-rötliche himmel chan usgseh.
aber ich wirds glaub au vermisse, dassi bim vom bus heilaufe d'sterne chan bewundere, und wänni glück han sogar es nordliecht...
di folgende föteli häd d'meike (ustuschschüelri vo dütschland) mit irere kamera gmacht. und stelleds oich eifach na 100 mal schöner, ächter, schärfer und intensiver vor :) und das da häd sich uuh schnäll bewegt, also so schnäll wienes langsams winke vellecht.
es bizeli wienachtsvokabular:
jul (gsproche "jül") : wienachte
gledelig jul : fröhlichi wienachte
julenisse : die bringed d'gschänk a wienachte, und sie gsänd so öpe us wie wienachtsmänner. und es git verschednigi type. de wichtigsti sind rødnisse, also rotnisse. die bringed d'gschänkli und wohned ursprünglich uf burehöf.
julekake : guezli (also kake heisst chueche, also wienachtschueche, sie händ keis eignigs wort för guezli. au im französische heissed guezli imfall gâteaux de noel. )
julebrus : süessgetränk wos nur um wienachte ume git
juletre : wienachtsbaum
pepperkake : uf hochdütsch pfefferkuchen, gits glaub ned uf schwizerdütsch, aber mer händ so guezli wo ähnlich schmöcked. chan ned guet beschribe wie die schmöcked :P
gløgg : es chrütergetränk womer mit oder ohni alkohol chan ha. chan au ned beschriebe wies schmöckt, has aber überhaupt ned gern ^^
23.desember =
lille julaften : chline wienachtsabig
24.desember =
julaften : vellecht öpe "heilig abig", aber julaften esch d'bezeichnig för de ganzi tag
25.desember =
1.juledag : erste wienachtstag (usgsproche "förschte jüledag")
romjula : (gsproche rumjüla) bezeichnet de ziitrum zwösched wienachte und neujahr. i dere ziit ladet mer oft befründeti familiene zu sich hei ii oder wird sälber iglade, und gad a fest. und mer tuschet wienachtsgschänk wo eim ned gfalled und nützt de usverchauf i allne läde us ;)
nyttårsaften : "neujahrsabig"
was sich so ide vorwienachtsziit ereignet häd..
am 1. dezember ide mittagspause esch de baum ufm schuelhofplatz mit liechter behange worde, es häd pepperkake ung gløgg för alli geh, hani voll herzig gfunde :)
mer ustuschschüeler händ dörfe de wienachtsbaum ide schuel dekoriere:D
han en wunderbar koselige (sehr positivs wort wo gmüetlich irgendwie beinhalted, chamer aber au uf persone awände) strickabig mit zwei vo mine norwegische fründinne verbracht.
"vorwienachtsfiir" mit de ustuschschüeler. am 9i am abig hämer d'blitzidee gha dass mer chönted ga schlittle ga, hämer dänn au gmach, eifach genial gsi :D
ich han mis erste norwegische buech fertiggläse. (keis chinderbuech,sondern sones richtigs, zemlich dicks buech!*stolz*) de film zum buech hani scho vorher gseh gha, und film und buech sind mega toll! :D da de trailer, dass ehr au mal chli norwegisch ghöred.(das esch ned de dialekt womer in tromsø redet)
http://www.youtube.com/watch?v=jqvemalS5bY
ide bibliothek esch e stadt us pepperkake baut worde, bewunderets sälber:
wienachte
wienachte sälber esch wider erwarte ohni heiweh vo statte gange :)
es häd öbrigens ned so wahnsinnig vell schnee dusse gha, s'häd sogar biz grägnet und es esch um di 3 grad warm gsi! normalerwis fangets im oktober afo schneie und es lit dänn meh oder wengier schnee bis im mai oder sogar juni.
wienachte esch v.a. en geballti ladig familie gsi. au normalerwis ässemer ja zäme znacht wänns gad und sitzed am abig ide stube oder so, aber 24. und 25. hani gar kei ziit i mim zimmer verbracht.
dezue sind mini zwei grosse gastgschwösterti na diheime gsi. min gastbrüeder trym(20) studiert normalerwis inre andere stadt in norwege journalistik. und die stadt esch so wit entfernt, dass mer mitm flugzüg reise mues.
dasch vlt na generell en zemliche underschied zode schwiz, sobald mer ernsthaft nemets hicho wot muemer flüge.
und au mini gastschwöster runa(23) wo in tromsø jus studiert und i erere eigene wohnig wohnt häd öber wienachte deheime gwohnt.
am 24. simer mitme wunderbare brunch in tag gstarted. dänn hämer askepott (aschenputtel) glueget. jedes jahr die immer gliche film luege ghört in norwege, oder zumindest in tromsø, au zo wienachte. und ich glaub askepott esch de typischti vo allne.
de film esch in tschechie dreit worde, und esch scho zemli alt. so alt, dass alli synchronisationsstimme vo eim ma gsproche wird und mer zemlich emmer na s'tschechische orginal ghört. und ab und zue seit di norwegischi synchronisationsstimm öpis wänn d'person s'mul ned mal offe häd xD
esch also zemlich amüsant :P
de rest vom tag simer ide stube gsässe, chli süesses us oisne wienachtsstümpf gässe, fernseh gluegt, gschwätzt, für im ofe gha, ois ibeldet dasses dosse chalt esch und vell schnee häd(wie scho erwähnt eschs zemli warm gsi und häd nor "wenig" schnee gha).
am abig hämer zerst gross und fein gässe. nachher semer na zemli lang am tisch gsässe und händ gschwätzt. han z.b. alles drüber erfahre wie d'geburt vo mine gastgschwösterti abglaufe esch, wie sie eri näme becho händ und alles so sache. han mich so richtig integriert gfühlt :)
und nach langem warte hämer endlich d'gschänk uspackt :D mini gastfamilie macht das so, dass immer eis gschänk under em wienachtsbaum föregholt wird und alli zuelueged währenddems uspackt wird.
so simer sage und schreibe 3 stund am gschänkli uspacke gsi!
ich han ganz velli tolli gschänkli becho, leider hanich es technischs problem mit de föteli vo mim fotiapparat :S ich probiers so schnäll wie möglich z'behebe:)
de 25. esch sonen umehäng, ide stube hocke, ässe(gaanz vell!), schwätze usw tag gsi. und bis am 3 ide nacht hämer na sones schlaus quiz gspillt (ich han kläglich verlore^^)
Brage revyen
Ide wienachtsferie wird vode schüeler vo kongsbakken (mini schuel) jewils es theater organisiert, wo brage heisst. Revy esch di allgemeini bezeichnig för so theater vo schuele, da in tromsø händ mega vell schuele so eis.
Es esch vo schüeler organisiert. also es git es paar wo öpe 25i sind wo au mithälfed. di ganze vorbereitige findet ide wienachtsferie statt. heisst ich bin die ganz wienachtsferie jede tag det gsi, ussert am 24. und 25. dezember.
alli vo a die schuel gönd chönd sich mälde und för eini vo folgende gruppene iträge: mat(ässe, das esch dänkt för die wo vom 9i am morge bes am 9i am abig det sind, d'schauspieler z.b.), kostyme(kostüm und kulisse, det bin ich gsi:D), skuespiller(schauspieler), musik(band wo d'vorstellig musikalisch undermalt).
ich find d'idee meega cool, ich mein i 2 woche oder so stelled öpe 200 schüeler es theater zäme! dass das überhaupt funktioniert.. *staun* und es esch erst na es mega cools theater worde!
also es esch keis zämehangends stück, sondern so einzelni sketch wo grössteteils um aktuelli themene handled und die ufne lustigi art präsentiered. themene sind z.b. d "butter-krise" und d'wahle in russland gsi.
zo dere sogenannte butter-krise, ich weiss ned wie vell vo oich devo ghört han aber ich erklärs mal schnäll.
sone diät wo druf basiert, dass mer vell fett und fast kei kohlehydrat esst esch sehr populär worde in norwege, und wäg dere diät händ vell lüt butter gchauft. dadezue esch au na grad wienachtsziit gsi, und ide wienachtsziit bruched natürlich alli butter zum guezli bache. und tadaa - buttermangel in norwege^^
es esch allerdings so gsi, dasses genau 1 buttersorte ned geh häd, und die händ mer diheime sowieso nie brucht :)
und mer häd chönne chleider vom revy chaufe, also en pulli und jogginghose. min pulli und d'hose sind leider voller farbefläcke weli mit dene gmalet han^^
uf dem link chönder föteli vom revy aluege:
http://www.nordlys.no/kultur/article5865739.ece
 |
| ned sones unglaublich vorteilhafts föteli, deför gseht mer druffe grad 3 sache: de pulli vom bragerevy, julebrus(rächts) und dass au d'milchpackig ide wienachtsziit wienachtsverzierige bechonnt :P |
|
nyttår - neujahr
öber neujahr beni bede fanni (ustuschschüeleri vo finnland) diheime gsi. d'aino (halb norwegeri,halb finnin, esch aber in norwege ufgwachse) esch au debi gsi. d'fanni wohnt öpe 1 stund osserhalb vo tromsø, zmizt ide natur also :P
öpe e stund nachem nachtässe simer id sauna gange. d'sauna esch sones hüttli gsi näbedem huus, und vorusse häds en veranda gha mit bänkli.
nach öpe 10 min ide sauna simer amigs use gange ufs bänkli ga sitze - mer sind also verusse gsässe be minus 12 grad!!! und es häd sich agfühlt wie wänns en warme summer namitag wär... *selbst nicht glauben könn*
de usblick i di verschneiti natur, de klari sternehimmel und s'edle nordliecht wo a besagtem sternehimmel umetanzed händ de abig perfekt gmacht.
und ufm heiwäg am nächste tag hani sogar mis erste rentier gseh, s'esch vell chliner gsi als ich mer die immer vorgstellt han^^
 |
| da chönder d'jagge bewundere womich tagtäglich vorem erfrüre bewahrt :P |
 |
| natur in stramsbukta (so heisst de ort wo d'fanni wohnt) - wuunderschön |
aja, na so zum schluss: ich chan jetzt zemlich guet norwegisch - so guet dassi es buech läse chan und plus minus alles verstahne, dassi säge chan wasi wot ohni dassi nach ergendwelchne wörter fröge mues usw. nor mal gfunde dass das mal gseit werde mues :)
allerliebsti grüess us tromsø, gianna <3
