fødselsdag und mørketid (geburtstag und "dunkelzeit")

hallihallo mini liebe fründe :)

zerst chonnt mal en hoffentlich informative bricht über min geburtstag:

am morge beni am halbi 8i ufgweckt worde wel unni, trygve und solveig alli früener id schuel/zode arbet händ müesse als ich. (di. hani jewils am 10ni schuel)
verblüffenderwiis beni aber sogar sälber ufgwachet, sones geburtstags-hyperaktiv-freu-gfühl häd i mim buch tobt, wie damals woni na chli gsi ben ;)
bin id chuchi geleited worde, wo cherzli ufm tisch brännt händ, 2 gschänkli, en (gchaufte,trotzdem sehr feine) rüeblichueche, fanta und e sones glace wo obe und unde schoggibiscuit häd und ide mitti vanilleglace (heisst das ähnliche wo mer händ maxibon?) gläge sind.
das glace häd na en tüfere sinn, am wochenänd häd nämli d'anna vo DE da übernachted, und mer sind so blöd gsi dass mer vergässe händ s'glace weder id gfrüri z'stelle und somit s'ganze glace flüssig und verdorbe gsi esch *verkriech*
am geburtstag händs mer drum sones chlises glace anegleit, mitm kommentar dassi da ned dra dänke mues es wieder in chüelschrank z'stelle^^
sie händ mer alli gratuliert (mit umarmig und küssli uf d'backe) und ich han d'gschänkli uspackt :D
vo unni&trygve hani, wie gwünscht, jogging tights becho. ich han mich ja soo norwegisch und integriert gfühlt woni mit dene is turne gange bin, da händ nämlich ALLI so hochsportlichi joggintights a :P
vo runa&solveig hani thermo-woll-underwösch för de winter becho^^

wo die andre gange sind hani mi dra gmacht s'päckli vo diheime und vom gotti uszpacke. vo dihei hani 2 cds vo pendulum(han die band am døgnvill festival känneglert), es t-shirt und räucherstäbli,woni garantiert ned im huus inne azünde wird, ich legg doch na wert druf ned usegschmisse z'werde wel s'ganze huus dänn nach räucherstäbli schmöckt^^ und es esch na en mega herzigi charte debii gsi :)
vom gotti hani es voll cools armband becho :)

ide schuel hani vode fründinne vo minre klass s'norwegische happy birthday gsunge becho, es esch vell fantasievoller als eifach nor happy birthday! hans de darja underanderam als geburtstagsgschänk ufgschribe und übersetzt, wänn sies mer schicke chan duenis da druf :)

vo de anderne ustuschschüeler hani die absolut abetigswürdigi täsche becho. und d'aleksandra häd mer sogar en geburtstagschueche bachet und id schuel bracht - das esch wahri fründschaft :D
und au dass sie uf d'idee cho sind en täsche z'schänke, han mer nämli überleit mer das z'wönsche weli nor d'nike täsche debi han, und die esch mer langsam zum hals useghanget. und tadaa, ich hans ned luut usgsproche aber die andere händs gwösst *hellauf begeistert sei*

nach de schuel semer (ustuschschüerler, meitli vode klass und eini wo met mer id chemie gad wo au schomal be mer dehei gsi esch) ines megamässig schöns kafi gange.

woni im bus heigsässe bin vom kafi beni wunschlos glücklich gsi, drüber dassi genau uf tromsø cho bin, zo dere familie, dassi genau die lüt känneglert han... das tönt jez total kitschig, aber es esch es tolls gfühl, nachli besser als das sich-mit-de-wält-absolut-im-iklang-fühle wels min geburtstag gsi esch :D

diheime beni na mit de aria ga laufe, wie als geburtstagsgschänk esches na agnehm warm gsi und s'häd nach herbst gschmöck.
und han brüno gluegt ->en enttüschig,han erwarted dass er so cool seg wie borat:(
und d'unni esch natürlich genau be dere szene inecho wo de borat grad vonre nackige stripperin halbe vergewaltiged und uspeitscht wird*vergrab* han ere dänn aber erchlärt dassi das ned gwösst han^^
vorm is bett ga send d'unni, solveig und ich na ide chuchi gsässe und händ chli gschwätz.
usm früe is bett ga esch dänn au nüt worde, han de fehler gmacht namal an kompi z'ga, und dänn hani allne welle zrugschribe.. aber was solls^^

gester (fr.) hani na s'geburtstagsfästli da diheime gmacht. es esch ganz vorbildlich ohni alkohol abgloffe wel d'runa und d'solveig au na im huus gsi sind und ich ewie doch na wert druf legge be dere gastfamilie blibe z'dürfe^^
esch natürlich trotzdem spassig gsi;) es sind d'meitli vo minere klass cho, wo d'gschänkli dänn geh händ, agfüet es bild :) sie händ sooo cooli sache gschänkt! :D ich mein, es bambinecessaire! *quiietsch* und de schal *einkuschel* und sternli und herzli stickers *schmelz*

und d'ustuschschüeler sind natürlich au cho :D d'anna, fanni und aleksandra händ da übernachted.
mer händ pizza, chueche(sälbergmacht*stolz), chips,schoggi und guezli gässe, gschwätzt, 500 days of summer gluegt(super film!) love story vode taylor swift gsunge... sehr spassig gsi :D

gschänk vo dadj, juli & tanja :D (die toblerone sind en bruchteil vo dem wo ursprünglich mal da gsi esch, de rest esch mer scho zum opfer gfalle^^)

D'Täg werded drastisch chürzer! 

jez wirds dänn langsam ernst, morn gad d'sonne am halbi 9i uf und am halbi 5i under, und vo tag zu tag gits 9min weniger sonne... *gruselstimmung erzeug*
da esch sost na en link wos di genaue ziite und alles druf häd:
http://www.hvafor.no/index.php/kategorier/praktisk/492-nar-er-soloppgang-og-solnedgang?location=Troms%C3%B8&year=2011#highlighted_row

vom 28.november bis am 13.januar wirds dunkel, die ziit nännt sich "mørketid", also dunkli ziit. (s'esch verwirrend, öberall stönd chli anderi date vo wänn bes wänn dasses esch)
di meiste norwegerinne und norweger schined sich uf die ziit z'freue, s'chan also ned so schlimm sii :P
ich freu mich ja prinzipiell au druf, trotzdem wird mer langsam chli mulmig bem gedanke dra dasses immer so dunkel sii wird wie jez*ängstlich aus fenster späh* ^^
sowit ich ghört han wirds aber ned de ganz tag glich dunkel sii, um d'mittagsziit ume gits son art zwieliecht, bin ja schomal gspannt wie hell das dänn wird!

und ich chans ned lah da na es paar bilder azfüege :D

chüel wirds langsam au...

dere strass entlang gangi amigs mit de aria ga spaziere :)

bachnamitag mit anna, fanni und aleksandra letscht wochenänd (d'brownies sind übelst verbrännt, s'esch aber lustig gsi^^)

love from tromsø <3

klimatypen und austauschjahre

en schöne tag am wasser (nöm so aktuell, esch ändi september gsi, aber es sind so schöni föteli^^)

min tolle,tolle huet *freude hab*

fanni :)

yfu "camp"

laura(DE), aleksandra, ole, carmen(CH)

letscht woche hämer es verlängerets wochenänd gha, also do.29.9. und fr. frei. d'norweger düend das aber gschickt schönrede, es wird nämli herbstferie gnännt. öb mer läppischi 4 tag frei scho ferie chan nänne, da drüber lössti sich strite^^

vo fr. uf sa. hämer es yfu after-6-weeks-camp gha. es sind alli usem hohe norde det anecho, insgesamt 6. aleksandra, ole und ich us tromsø city, d'carmen (schwiz) vo hammerfest, d'laura (dütschland) us tana, nöch bede russische grenze und de nutakid (thailand) vo harstadt.

eigentlich hättemer sölle ines feriehüsli ga.
-> churze ischub: das isch absolut typisch norwegisch, es schined alli familie es feriehüsli z'ha. wobi feriehüsli eigentlich ned korrekt esch wel mer au sehr gern am wochenändi dethi gad. und ide "hjtta", ide natur und mit ned allzu vell technik findet de norweger entspannig :D
oise hjtta-usflug esch leider platzt wel em nutakid sini gastmueter ned fähig gsi esch ehn am fr. morge ines boot z'setzte, sie  häd gfunde er chönni ja am sa. mit de familie zäme uf tromsø cho. dumm nur dass am sa. s'träffe scho verbii esch..
bis besagter nutakid acho esch esches dänn 8i am abig gsi und mer händs ois ide regine(yfu leader vo nord-norwege)erem huus bequem gmacht gha.

programm häds eigentlich ned wörkli gha, ossert dass mer am fr. abig es chartespiel gmacht händ womer je nach charte öpis positivs oder negativs öber familie, ässe, schuel oder norwege allgemein händ müesse säge. und am sa. häds na einzelgspröch geh, falls öper öpis bespreche wel wo er/sie ned vor allne wel.
di restlichi ziit hämer gässe, gschwätzt, umeblödelet und was mer halt so macht:)

schwizerdütsch
vo sa. uf so. häd d'carmen be mer öbernachted. mer sind allei gsi wel trygve,unni und solveig uf gratangen is feriehüsli gange sind bes am so.
s'esch puure luxus gsi di ganz ziit chönne schwizerdütsch z'rede! s'esch scho fast komisch gsi dass mer nöm vor jedem satz es biz mues nadänke, sondern eifach chan schwätze.
dassi normalerwiis en "dänkpause" han bevori öpis säge hani öberhaupt erst gmerkt woni weder schwizerdütsch gredet han, wels die dänkpause dänn ebe nöm brucht häd. koomisch ;)

haha, womer ide gfrüri sind ga glace sueche esch det doch tatsächlich en tote vogel gläge!! nach em erste schreckensmoment esch mer igfalle dass de trygve ja mal es wochenänd uf vogel-jagd gange esch mit kollege, und dass de vogel vermuetlich vo det esch. trotzdem, en vogel ide gfrüri!? ich glaub mer werded de sogar ässe :S

abgseh vo dem chline schock eschs megamässig gmüetlich gsi, mer händ film glueged, heissi schoggi trunke, gschwätzt... :)

ich han zopf gmacht *stolz*

 ersti unagnehmi erfahrige mit stimmigsschwankige

ide letschte woche hani s'1.mal so heiweh-demotiviertheit-sebstbewusstsii-sinkend-ned-guet-fühlend schüb gha. ich probiers so guet wie möglich darzlege.
allgemein chani säge dassi a eim tag da in norwege glaub grösseri stimmigsschwankige chan ha als ide schwiz. es chan sii dassi am morge mitme miese gfühl ufstane, ide schuel motiviert wird vode lüt dete, bim mittagässe en schlächte-luune-schub, am namitag eschs mer elendiglich langwilig ide schuel, bim heifahre hani weder super luune und fühle mich mit mer und minre umgäbig i friede und glichgwicht, vorm training hani training-aschiss, im training muntereds mich uf mit de anderne z'rede und merke wiesi mer langsam as herz wachsed...
en zemlich verwirrendi sach also^^
imne erhellende gspröch mit enre üsserst weise person (darja) esch mer folgendi verglich in sinn cho. vlt wüssed einigi vo oich dass kontinentals klima, z.b. wüestene, grossi temperaturunderschied währed eim tag ufwiised. während bem ozeanische klima s'meer usglichend würkt, so dass d'temperaturunderschied ned so gross sind.
i minre theorie esch norwege also s'kontinentale klima und d'schwiz s'ozeanische. s "meer" ide schwiz wär dänn di vertrauti umgebig, d'lüt, dassi chan abschätze was vo mer erwarted wird, was "normal" esch und so witer. das alles git en gwüsse rückhalt.
da in norwege hani das alles ned (nani), und drum chonds zo grössere schwankige.
hach, die theorie esch so schlau *hin und weg sei* ^^
ich mues säge, es esch na schwierig alles so ufzschriebe wies esch, wel ich mer sälber ned ganz sicher bin wies jez eigentlich genau esch. gib mer aber ehrlich müe:)

zum abschluss:

haar gschnitte, ich fühl mich so liecht, es isch supi :D

hans gfühl es wird langsam winter ...

... chalt aber schön :)

öpis wichtigs hätti na fast vergässe, am mi. 5. oktober beni im handball training doof usgschlipft/umgheit, und infolgedessen do. und fr. im schnecketempo und humpelnd ide gägend umegloffe.
häd sich underdesse zum glück bessered, nani ganz uskuriert, aber ja :)

tschühüss mitenander, bis zum  nächste mal *weisses taschentuch schwenk*

ps: de sandmann gits imfall au in norwege :)