esch ja scho weder es zemlich langs ziitli her set ich s'letscht mal gschribe han.
und es esch immer so vell passiert, und ich han emmer welle alles drischribe und dänn glich nüt gmacht und so witer und so fort..
aber ja, lassts euch schmecken :D
föteli vom herbst wo eifach no müend i de post :P
 |
| aleksandra und ich |
 |
| kongsbakken (mini schuel) |
ich find dasses ade ziit esch zum oich chli meh über di norwegischi sprach(e) z'verzelle. nachher chond dänn au na en zemlich lange teil öber mich, wer ned alles wot läse chans ja sälber selektioniere^^
zerst emal, öpis mega cools: norwegisch, schwedisch und dänisch sind so nöch underenaner verwandt, dass norweger, schwede und däne sich ohni grossi problem underhalte chönd.
han z.b. mal en film mit dänische undertitel gluegt wels kei norwegischi gha häd, und hans zemlich genauso guet verstande wie wänns norwegisch gsi wär!
wasi na cool find da, nur ganz wenigi film werded uf norwegisch synchronisiert, vlt es paar chinderfilm wel chinder d'undertitel nani chönd läse. aber de rest esch englisch mit norwegische undertitel. na guet zum lehre, so häd mer englisch und norwegisch schön näbedenand ;)
aber au chli schad, dass mer norwegisch gsproche nur ide norwegische film gseht...
in norwege gits 2 offizielli sprache, bokmål und nynorsk.
vo 1380 bis 1814 esch norwege mit dänemark vereint gsi. während dere ziit esch di alti norwegischi schriftsprach usser gebruch cho und dänisch esch amtssprach worde.
ide ländliche gägende sind aber die ursprüngliche dialekt immer na gredet worde.
nach de trännig vo norwege und dänemark häd sich en debatte drüber entzündet, was jetzt die offizielli sprach söll sii.
di einte händ gfunde, mer söll alle dänische ifluss usser acht la und us de norwegische dialekt en neui sprach ufbaue.
di andere händ (minre asich na realistischer) gseit, dass mer öpe 400 jahr kulturustusch ned eifach uf d'siite schiebe chan.
ide 1850er jahr esch dänn nynorsk entwicklet worde, en sprach wos ziel häd em dialektsprechende volk en schriftsprach z'geh, eifach erchlärt: wie alli schwizerdütsche dialekt zämegna, eimal chräftig gschüttlet und voilà :P
dänn gits na bokmål, das esch nöcher bem dänische.
öpe 12% vode gmeinde händ nynorsk als amtssprach, vom rest häd ei hälfti bokmål und di ander hälfti esch sprachneutral(was meistens bokmål heisst).
da es aschaulichs bild:
de underschied zwösched bokmål und nynorsk esch jetzt ned soo krass gross, ich chan nynorsk einigermasse versta.
mini klass häd jetzt grad es halbs jahr nynorsk, heisst sie müend essays, probe usw uf nynorsk schriebe. sie hasseds aber alli wel nynorsk aschinend zemlich verschiede vom tromsøer dialekt und drum ned so eifach esch för sie.
amüsanti norwegischi wörter
"joda!" chan als juuda oder joda usgsproche werde. under ois ustuschschüeler en running gag wägem joda, dem chline, grüene, alte männli vo starwars. d'norweger schined de witz dehiner iwie ned so richtig z'chegge^^
"flott" bedüted so zemli s'gliche wie s'dütsche flott, nur dasses ned veralted esch, es esch topaktuell! am afang hani jedesmal fast en lachafall becho wänn öper mer gseit häd, dassi das aber "flott" gmacht hegi, mittlerwiile hani mi dra gwöhnt xD
set zemli langer ziit hani jetzt en schuelcomputer becho :D
glaub das hani ja gar nanie erwähnt: ide norwegische schuele händ alli schüeler en eigete computer womer billig vode schuel chan (bzw mues) miete und am ändi vode schuelziit au billig chan chaufe.
au probe werded zum grösste teil am computer gschribe und arbeite abgeh, was ufn art super esch zum papier spare, ufn art zemlich idiotisch wel mer dänn s'internet zurate zieh chan.
vellecht sind norwegischi schüeler eifacht so ehrlich? glaubi ned ^^
aber da esches vell normaler, dass mer inre prob hilfsmittel bruche chan. zode matheprob hämer es A4 blatt spick chönne mitneh, ade gs prob (ufsatz) hämer s'internet chönne bruche...
in chemie häd mer leidergottes alles allei müesse erledige:(
was au anders esch in norwege als ide schwiz, d'lüt (au d'jugend) häd vell eher funktionells züg wie rägejacke, jogginschue usw ah, und es häd ned die aura vo pinlich und unstylisch.
es esch z.b. absolut modekomform zu hot pants, strickjacke, sorgfältig gstreckte haar usw rägestiefel und rägejacke azha.
au lüt wo mit jogginschue id schuel chömed sind ned als, ähm, spezieell abzstämpfle, sonern sind zemlich normal.
schlussendlich eschs dänn aber glich ned so, dass d'norwger unstylisch sind. kei ahnig wie das möglich esch:P
und es git da erschreckend velli solariumbrünti mit wissblond gfärbte haar :S
ich han also scho ersti unheimlichi ich-chan-kei-dütsch-meh erläbnis gha 0.0 eimal i gschicht hani mer so uf dütsch notizte gmacht und han ergendwie welle schribe, dass en gwüssi ziitperiode agfange häd.
uf englisch und norwegisch gits ja das wort "start".
han jedefalls mindestens 5 minute brucht zum usefinde werom "Diese Zeitepoche starter.." so komisch tönt, wels das wort im dütsche eifach ned git. ich bin nachher sooo verwirrt gsi ;)
das erläbnis esch mitlerwile scho öpe en monet her... (da gsehnd ehr wie lang ich scho a dem post schaffe^^)
wichtigi sache set letschtem post:
OD-dag (Operasjon Dagsverk=Operation Tageswerk)
das esch en tag wo sowit ich weiss in ganz norwege ade vidergående skole (3 jährigi schuel vo 16-19, ich glaub ich sött au mal öpis über s'norwegische schuelsystem schribe *inneri notitz*) duregfüert wird.
a dem tag chönd alli schüeler freiwillig ga schaffe ga anstatt id schuel z'gah. mer chan schaffe wo und was mer wot (z.b. au diheime putze), mer mues nor mindistens 75 Fr. verdiene.
de erlös gad dänn ane hilfsorganisation in afrika (das jahr in rwanda). d'woche vorher gits au sonen International Day wo en film über rwanda zeigt worde esch und mer dänn als klass verschiednigi präsentatione und vorträg rund ums thema "soziali gerechtigkeit" und so sind ga aluege.
ich find das ganze absolut genial, ich mein, chönder oich vorstelle WIE vell gäld da schlussendlich zämechonnt? *fan sei*
han au scho die ganz grössewahnsinnigi idee gha als maturarbeit de tag ade kanti wettige(oder ide ganze schwiz?*augen verrückt glüh*) izfüere oder öpis i die richtig. glaub zwar ned dasses realisierbar esch, aber träume dörf mer ja :)
ich han dur zuefall a besagtem OD dag na en job becho, bin scho ide schuel gsi welli nüt gfunde han(ok, ich gibs zue, hans verhängt ernsthaft nach eim z'sueche), und dänn connt so eini id klass "mer händ na jobs, wer wel?"
ich natürlich engagiert gmäldet. und so hanich waldwägli (wo im winter glaub langlaufloipene sind)
mit sand ufgfüllt. so mit garetene und schufle, zäme mit 2 anderne schüeler vo sonre sportschuel. mega cool gsi :D
SATS fitness center
set em 10.november ben ich stolzes mitglied be SATS, das esch es fitness center (wie de titel scho seit).
han sogar en halb stund gratis e wegwisendi persönlichi traineri becho und han es paar maschineli woni nach möglichkeite jedesmal mach wänni dete bin.
ich gang eigentlich immer zäme mit de fanni, ustuschschüeleri vo finnland. zäme gömer i spassigi kürs :D z.b. zumba, oder "dancing friday" ^^
macht voll spass :P
und s'center esch zemlich im stadtzentrum, drum chömer grad nach de schuel ga. es git au na es 2. center witer eweg wo aschinend grösser esch, das gömer jetzt dänn au mal ga usteste :P
ustuschschüeler - mini wahre fründe
ide schuel beni mit norwger und de ustuschschüeler zäme, während de freiziit so zemlich emmer mit ustuschschüeler. es esch eifacht so vell eifacher öpis mit dene z'mache wel die-wie ich-sost nüt schlauers z'tue händ xD
wohingäge d'norweger eres ganze läbe scho da gläbt händ und drum e guet dureplanti freiziit händ...
natürlich lahn ich mich vo dem ned entmuetige und blib am ball, aber ebe, mini beste fründe da sind d'ustuschschüeler.
mit ehne chani ide öffentlichkeit luthals schräg ide gägend umesinge, zwoidütigi blick während schuelstunde ustusche, choreographie för "i feel it in my fingers, i feel it in my soul, christmas's all around it" istudiere, alles was mer halt so schlaus macht :D
föteli vom schlittschüele:
 |
| fanni, ich & pan |
 |
| ich bin soo talentiert xD |
 |
| pan, fanni, ich und evelina (d'evelina esch kein ustuschschüeleri, sie esch voremne monet vo litaue da ane zo erem vater zoge. und han das wochenänd s'1.mal so richtig mit ihre gredet und usegfunde dass sie ganz en netti esch :P) |
traum
set emne monet oder so chömed persone woni da in norwege känneglernt han i mine troim vor, ich düte das mal als es guets zeiche ^^
höt hani troimt gha, dassi ergendwie plötzlich ide schwiz zrug bin, und han mi ned chönne erinnere wieso, und aktion norwege esch abblase gsi 0.0
ich säg oich das esch es scheissgfühl gsi, wel ich han im traum wörklich gmeint dassi jetzt um 8 mönet ustusch bracht worde bin, und han dänkt ich wet doch umbedingt wösse was währedem rest vom jahr passiert, und ich han mich ned mal chönne vo allne verabschiede, und sowieso, bin ganz hysterisch worde.
zum glück häd dänn de wecker glüted und ich bin ufgwachet und han erliechetered chönne feststelle dassi ned us ergendwelchne unerfindliche gründ heigschickt worde bin ;)
heiweh
ich han mich letschti mal so gfrögt, öb ich ned scho lang so voll krasses heiweh hätti sölle becho. han dänn also (intelligenterwiis) agfange i mich inezhorche, han a diheieme dänkt, a mini brüederherzli, mama und papa, es gmeinsams znachtässe, d'kanti, mensa, zwöschestunde, handball, ,umetrödele und blödele nachemne match...
und nach wenige augeblick hani gmerkt dassi jetzt sofort sötti ufhöre a das züg z'dänke. ich duens mal veraschauliche emne brunne voll "diheime".
i mim alltag da lueg ich de brunne ab und zue ah, lauf immer weder mal dra verbi, aber lueg nie allzu tüf ine.
wänni mi jetzt also über de brunne büge und gnau inegluege und itauche (mer stelli sich das ruhig wie em dumbledore sis denkarium vor) esch nömme guet.
han mich dadrum schleunigst weder zrugglehnt und wird de netti brunne nor us sicherer entfernig betrachte.
weiss ned öb das es guets bispiel esch, aber ich hans zumindest probiert :)
wie scho früener erwähnt, ich chan nor probiere alles was ich empfinde z'analysiere und beschribe, öbs wörklich so esch sei mal so dahingestellt.
schuel
ich mach ide schuel i allne fächer mit, und schrib au d'probe mit. i parne fächer chonds besser und i paarne schlächter use^^
d'norweger händ au note 1 di schlächtist und 6 di best. sie händ im zügnis allerdings nor ganzi note, also kei 4-5 z.b. und au wänn sie bede probe sache wie 5+ oder so händ esch das aschinend ned glichsetzbar mit 5,5. 5+ seg zemli nöch be 6, aber immer na schlächter als -6. chom sälber ned wörkli drus^^
han jedefalls i gschicht(s'esch en ufsatz gsi womer d'begriff wikingerziit und ackerbaugsellschaft politisch,sozial und wirtschaftlich hetti sölle beschribe) en 2+ becho xD
wenigstens kein 1er :P
deför hani in chemie inre prob womer am 10.10. gschribe händ (also 2 mönet nachdem ich da acho bin) en 4+ becho :D en note wo sogar ide schwiz ned gschämig wär :D
im franz und itsch hani sowieso gueti note wel die andre ned so guet sind *freu* ^^
HÖT ESCH DE LETSCHTI TAG MIT SONNE GSI, MØRKETID HÄD DEFINITIV AGFANGE ! :D
s'esch jetzt aber ned so dasses di ganz ziit stockdunkel esch, es git es paar stunde tagesliecht(es esch nanig zwieliecht, s'esch ned so duster, mer chans med guetem gwösse na als tagesliecht bezeichne), aber eifach kei direkti sonne meh. ich glaub im dezember wirds nor na so öpe 1 stund zwieliecht geh...
und am 21. januar chonnt d'sonne au scho weder zrug :D
<3
