Trondheim, sami nationalfiirtig & CLAUDIO :D

Vom 25. bes am 29.januar esch in trondheim s'midyears-camp vo YFU (minre ustuschorganisation; Youth For Understanding) gsi. 

das esch eifach F A N T A S T I S C H gsi!!!

Am schluss eschs so trurig gsi vo allne abschied z'neh :'( und di erste paar täg woni weder zrog ide schuel gsi ben häd sich alles so falsch agfühlt, wels nöm so gsi esch wie im camp, so s'typische nachemne-lager-gfühl halt. 

mer händ verschednigi blöck wie "kultur und wert", "sprach und apassig", en füerig dor trondheim und freiziit gha. eimal hämer sogar gmalet:D

S'coolste am ganze camp esch gsi di andere ustuschschüeler weder z'träffe, z'ghöre wies die so gha händ und sich ustusche.

Zemlich alli händ meh oder weniger norwegisch chönne rede, es paar flüssend und mega guet, es paar einzelni händ nor wenigi sätz chönne.

S'esch au mega lustig gsi, dass alli sozäge en norwegischi "herkunft" becho gha händ, z.b. händ ja all de dialekt vo erem ort gredet. 

Es herrlichs gfühl wänni mit irgendwelchne norweger han afange rede und die plötzlich fröged: "gäll du besch vo tromsø?" :D

und, was au mega lustig gsi esch, es häd sones spiel geh wo dur s'ganze lager duregange esch. es häd KISS&KILL gheisse.
am afang händ alli en zettel mit emne name druffe becho. die person wo ufm zettel stat häd mer müesse "umbringe". Umbringe duet mer öper idem mer ehn/sie küsst(uf d'schultere küsse esch au ok) einzigi bedingig: niemert dörfs gseh. wämer öper umbringt bechonnt mer de zettel wo de ander gha häd, mer häd also öper neus zom umbringe.
das esch relativ amüsant gsi ;) ei szene, wo dänn de priis för "best kill" becho häd esch folgendermasse gange:
be dere stadtfüerig dor trondheim sind en ustuschschüeler und en leiteri chli hinder em rest vode gruppe zrugblibe. de ustuschschüeler häd d'leiteri als person zum umbringe gha, häd also nor druf gwarted bes alli weg sind.
wo alli usser sichtwiiti gsi send esch er abegchnünlet und häd eri hand gna und sie küsst. d'leiteri häd dänn natürlich chegged, dass sie grad umbracht worde esch,und seit so "aah neei".
und jetzt überleggi mer sich mal wie das för d'lüt rundume usgseh häd, eine wo forenre junge frau chnünlet, küsst eri hand, mer dänkt es segi en hüratsatrag... und dänn eri raktion "neeeeei" xD

trondheim liit öpe ide mitti vo norwege

öpis wunderbars eschs natürlich au gsi, d'sonne mal weder so richtig hell und (verhältnismässig) höch am himmel stah z'gseh :)

wunderschöns wätter, wonderschöns trondheim :)

de friedhof und de berüemti nidarosdom - zom vode underkunft in ufenthaltsrum cho hämer emmer müesse dur de friedhof laufe, voll cooli hogwarts-atmosphäre gsi :P

das bild mit de rose esch mis. mer alli händ eigentlich eifach so druf losgmalt, aber die frau wo das gleitet häd esch so guet gsi im oisi bilder interpretiere, dass mer am schluss alli devo überzügt gsi sind, ächti kunstwerk erschaffe z'ha ^^ mis bild heisst jetzt also "the honest" wel die rose sozäge mit usbreitete arm dete stat ;)

I LOVE TRONDHEIM <3

da sind an links zo videos wo lüt vom camp zämegstellt händ :) bim 3.video be öpe min 3 esch na son sehr nostalgischi szene vode letschte stunde wo sich alli tschüss säged.

http://www.youtube.com/watch?v=K6Le3ZrWyrc&feature=youtu.be

http://www.youtube.com/watch?v=UmshQ6C5HVw&feature=share

http://www.youtube.com/watch?v=cfnDIy3n3eQ&feature=youtu.be

BESØK AV LILLEBROREN MIN - BSUECH VO MIM CHLINE BRÜEDER :D

am fritig, 3.februar bes am sa.11.februar esch mich de claudio ga bsueche cho :D
es esch sooo cool gsi ehn weder z'gseh!! z'merke, dass oisi wunderbari gschwösterbeziehig immer na di glichi blebe esch, oise komischi humor, oisi meinigsverschedeheite, de glühendi hass woner so liecht chan erwecke wäner wot... xD nei, witz beiseite, danke vell mal brüederherzli dassd mich ga bsueche cho besch! :D

was hämer so gmacht? mer send i 3 verschednigi musee gange, er häd brunost und diversi fischgricht uftischet becho, mer händ en pizza-how-i-met-your-mother abig mit anderne ustuschschüeler gh, send es rentier-ränne ga luege(dadezue witer unde na meh), er esch 2 täg id schuel mitcho, er häd uf norwegisch zälle glehrt(ich bin ja so stolz) und na velles meh :)
was ich lustig gfonde han: er esch am 8i am abig oder so scho voll kaputt gsi wels scho "so früe" dunkel worde esch. total strub, ich hans gnosse dass d'täg weder einigermasse lang sind, er häd mid müedigkeit z'kämpfe gha wels so dunkel gsi esch.
zode sprach: wie ich das au scho erfahre han woni am afang da anecho ben, wämer ganz konzentriert zuelost chamer verstah um was s'gspröch öpe handlet.(also meistens)natürlich eschs aber sehr ermüedend...

Sami nationalfiirtig

am mo., 6.februar esch de nationalfiirtig vode Same (au "Lappen") gsi. Das esch es volk wo im norde vo norwege, schwede, finnland und russland läbt. Sie händ au en eigeni sprach "Samisch", wo zode gliche sprachgruppe wie finnisch ghört.
während und nachem 2.weltchrieg sind d'same als minderwertigs volk agseh worde, d'chinder sind i norwegischi schuele gschickt worde wos nor norwegisch händ dörfe rede, sie händ sich nöm Same dörfe nänne, sondern sind "samischsprächendi norweger" gsi, sie händ also ned dörfe eri eigeni kultur und sprach usläbe.
hüt wird versuecht das weder guetzmache indems grundrächtgsetz git wo samene eres land zruggit, idem schuelene uf samisch gfüert werded, schilder uf samisch und norwegisch agschribe sind usw.
das esch aber au ned alles eifach, es werd drüber diskutiert, wie vell rächt d'same jetzt sölled becho, so dass ned am schluss samene gägenüber "normale" norweger bevorteilt werded, det wod schuelene uf samisch send: was macht mer dänn mit de chinder wo norwegisch reded?
ich find das uh interessant und chönnt na stunde drüber schribe, aber da das vlt ned alli soo interessiert chömemer jetzt zom "action" teil. am sonntig häds nämlich ide stadt es rentier ränne geh:
so näbebii: a besagtem so. esches -18 grad gsi, und dezue häds an übelst fies gwindet. das häds zom bis jetzt chältischte tag gmacht wonich je erläbt han. graausig! wos nachher -5 grad gsi esch hanich mich gfühlt wie im hochsommer!

uf dem bild eschs öpe 2 am namitag :)

links d'flagge vo finnland, rächts vorne d'sami flagge, hindedra di norwegischi flagge

womer chli usserhalb vo tromsø gsi sind, natur gnüsse :)

er esch scho so erwachse worde, min grosse chline brüeder :P

was mer am afang au ufgfalle esch, ich aber dänn vergässe han uf de blogg z'tue: einigi busstatione send mit em "rugge" zode strass. zemlich komisch eigentlich ;)

Lea, Claudio, Fanni & Anna, d'lea esch en ustuschschüeleri vode schwiiz wo au in norwege im ustusch esch, nöch bem nordkap. sie esch uf tromsø ga eri gastschwöster und ois anderi ga bsueche cho :)

http://www.youtube.com/watch?v=EeG6Rn1AWOc&feature=player_embedded
d'fanni und ich händ die geniali idee gha, dass mer es video sötted ufneh womer norwegisch droffe reded, und dänn chömers nach 5 mönet weder aluege :D esch vlt na lustig för oich zom luege wel mer mich norwegisch rede gset ;)

und somit verabschiede ich mich au scho weder, schöni ziit und bes zom nächste mal *winkewinke* :)